2025 жылғы 23 маусымда «Балық шаруашылығы ғылыми-өндірістік орталығы» ЖШС-не жұмыс сапарымен су жануарларын қорғауға арналған биотехнологиялық құралдардың жетекші әзірлеушісі болып табылатын Қытайдың Jiangsu Hitide Biotechnology Co., LTD (HITIDE Biotech) компаниясының өкілдері келді.

Сапардың мақсаты — акваөсіру саласындағы аурулардың алдын алу және HITIDE Biotech компаниясының инновациялық биотехнологияларын Қазақстандағы балық шаруашылықтарына енгізу мүмкіндіктерін талқылау.

Делегация құрамында:

• Доктор Линь Сюйе – HITIDE Biotech негізін қалаушы, жануарларды вакцинациялау саласында 30 жылдан астам тәжірибесі бар сарапшы;
• Доктор Фрэнк Ли – жетекші америкалық ғалым, компанияның халықаралық жобаларының техникалық жетекшісі;
• Компанияның ғылыми-зерттеу және өндірістік тобының мүшелері.

Кездесуді «Балық шаруашылығы ғылыми-өндірістік орталығы» ЖШС Бас директор, б.ғ.д., профессор, ҰАҒА академигі Исбеков Қ.Б. жүргізіп, акваөсіру саласындағы биологиялық қауіпсіздік пен балық шаруашылығының тұрақты дамуы мақсатында халықаралық ғылыми-өндірістік компаниялармен әріптестіктің маңыздылығын атап өтті.

Сондай-ақ, кездесуге «ҚазҒЗВИ» ЖШС бас директорының орынбасары, ветеринария ғылымдарының докторы, профессор Абдыбекова А.М. қатысты.

Кездесу барысында қытай тарапы компанияның келесі негізгі технологиялық платформаларын таныстырды:

• су жануарларына арналған пероральді вакциналар платформасы (қорғау деңгейі 70%-дан жоғары),
• антимикробтық препараттарға арналған кері орау технологиясы платформасы (пайдалану тиімділігі 98%-ға дейін),
• инновациялық ақуыздық вакциналар мен вирус/бактерия байланысатын ақуыздар платформасы.

Сонымен қатар, жаңа вакциналарды бірлесіп зерттеу, клиникалық сынақтар өткізу және пилоттық жобаларды іске асыру мүмкіндіктері талқыланды.

Сапар нәтижесінде ұзақ мерзімді әріптестікті дамытуға өзара қызығушылық білдіріліп, ынтымақтастық туралы ниеттестік меморандумына қол қойылды.